We dey for Madam Shine Buka dey enjoy 9 o'clock pm in di night nack.

E come be like say make we no comot for dia again. True true, our union chairman, Jimoh ready to finish us with drinks and pepper soup dat night. I come suspect say Jimoh go don win Baba Ijebu.

Na dat time Sikiratu go tanda for one corner signal me make I come. I take style stand up like say I wan go piss.

As I go meet Sikiratu for dat dark corner outside Madam Shine Buka, Sikiratu come tanda with me face to face and body to body. E put im two hand around my neck.

Di next ting be say, Sikiratu hold me tight, e put im mouth for my mouth, bring out all im tongue, put am inside my mouth and begin use im tongue dance konkoma inside my mouth. I nearly faint. Tori Olorun!

After dat, Sikiratu begin use hand rub my head. Den e come say, “My honey Oga MAT, you know say I love you well well.” I tell am say I know and I love am too.

E say, “Honey, e get one ting wey I wan make you do for me if you love me true true.”

I tell am say I dey ready to do anyting for am. I no come know weda na me dey talk, abi na di 4 bottles of My Usual wey I don consume dat night.

Sikiratu come say, “Dat’s my Honey! Sweetheart, I wan make me and you sleep togeder dis night. I need you, and I know say you no go tell your sweet baby no.”

I wan tell Sikiratu no, but di babe don already set my body on fire. Everyting for my body don stand patapata like Standard Bank, and na so I come dey shake like Shakespeare.

(To be continued)

Make we jam again on Friday.

Tank you

Tank you very much

And tank you very, very much indeed.