Na two sisi dey serve drink for dat Obalende joint. Di order sisi dey serve point-and-kill. Di way I see dem, di three both of dem go don born tire for village before dem come dey do sisi for Lagos.

I tell one of dem make e serve me My Usual. Di ting cold for dia sha. I take two bottle, e no be like say I take anyting. Na im I top one again for di road.

I look time, e don dey go 7 O’clock pm in di evening. I bring out 1k give di sisi wey serve me. I say make e give me change. Na so di buka girl jus dey look me anya anya like say I be Taliban.

I tell am say make e do quick, say I dey go mainland and time don go.

Di sisi tell me say my money still remain N500. I say for what? Shey no be di ting wey I buy N300 for Madam Shine Buka for Ikeja on Saturday?

Di sisi begin hala. E say abeg make I give am im money quick make e go answer order customer dem.

E say weda na from moon I drop wey I no know say everyting don cost for Naija.

E say na my old age e dey respect, if no be so, e for don drag me for my shokoto trouser. Shiioorr!

Na so all di customer for di joint come dey look me o.

I bring out di last 1k wey dey my pocket give di sisi and collect change.

Na so I begin enter road dey come from Obalende to Abule Egba dat night with only N500 for pocket. If my guonguoro tyre been go down or anyting happen for road dat night as I dey come nko?

Na im make I don dey get second mind on top dis My Usual wey I dey nack every evening after work to take relax my body. After all, di ting no be food.

Make we jam again on Tuesday.

Tank you

Tank you very much

And tank you very, very much indeed.