Wen I dey tell una say one day go be one day, I go be Chief Driver for Aso Rock, una tink say na “My Usual” dey shack me.

I know say, if I make mistake enter as Chief Driver, I fit come out as anyting, even as Oga patapata of Naija. Yes ke!

I happy well well yesterday wen I hear di tori wey di two bobo wey I carry for drop go Oregun dey nack.

E be like say di two bobo na twin broda dem be.Dem resemble gan. Dem carry di same tall, di same bie bie, di same big head, and even wear di same clothe. I sure say dem go dey nack di same sisi sef, and di sisi no go ever sabi who be who, becos di two bobo too resemble. Tori Olorun!

Dat one sef no be di koko. Di main di main ting na di tori wey dem nack since wen dem enter my guonguoro for our garage wey dey near Ikeja under bridge.

Dem dey talk about one Aunty wey dey hold all our Naija money tele tele.

I no even know say dem been pursue dat Aunty Kemi comot for Naija becos say e go meet Oluwole printer make e give am one kind paper to take be Minister. Na for di two broda mouth I hear am as I dey drive dem go Oregun day before yesterday.

Na also for dia mouth I hear say Aunty Kemi been go court to tell court say wetin e do no be bad ting.

And na for dia mouth I hear say true true, court concour dat day gan gan say Aunty Kemi no do bad ting.

Dem say court even talk am say, you no need to show anybody any paper to become Minister, weda Oluwole paper, Mushin paper or Daura paper sef. Olorun Oba o!

If you see as my belle sweet wen I hear dis ting for my passenger dem mouth! Ehn?

Na im make, I don dey ready small small becos dis 2023 wey dey come so, I go park dis my guonguoro for one corner.

I must enter Aso Rock. If no be as Chief Driver, e go be as Minister or VP academics (Na anoder passenger been call dat name o)

And make anybody tanda for road to ask me for any paper, I go show dat person my red eye. I go show dat person say dis Naija na all of us get am, no be one person.

Make we jam again on Tuesday.

Tank you

Tank you very much

And tank you very, very much indeed.