Di madam come dey show di Akoka school hostel sisi dem di market one by one and how to use di cream.

E say, “Dis one na for any Senator wey you wan catch, weda for Abuja or for Lagos.

“If you wan comot like tomorrow morning, you go first rob am for your face for night wen you wan sleep. Wen you wake up for morning, you baf, wear fine clothe, mix am with makeup and rob am again for your face. Any Senator wey see you, even if your face resemble Chimpanzee, di Senator must to call you.”

Di madam come say make dem check di label wey dey for di bottle body, say na Ghana product and e no dey fail lai lai. Di madam say if e fail, make dem collect dia money back.

Na so di madam bring out all di market one by one. E say if any sisi wan banker, e dey. Army General own dey. Oil company director o, businessman o, minister o, Alhaji o, church GO o, all dey.

Governor own sef dey, but na dat one cost pass.

One sisi ask weda any one dey for Obi Cubana. Di madam promise am say e go bring am next week.

We no even spend like 20 minute for di Akoka school hostel, di big Ghana-Must-Go bag empty patapata. And na so di madam smile till I drop am back for Ikeja bus top.

Before e come down sef, di madam pay me my money complete, e even add jara for me.

Make we jam again on Tuesday.

Tank you

Tank you very much

And tank you very, very much indeed.