And wetin di sisi dey shout as e hold Mutiu for shokoto trouser no good make anoder ear hear am.

Di sisi tell Mutiu say: “I don catch you today. Shebi you tink say I no go fit see you again. You come di hotel wey I dey do my runs for Shogunle, you f..k me di first day, you no pay. You come di second day, f..k me again, you no pay.

“Wen I ask you, you say you be my good customer and you wan use e-Naira pay me. You say e-Naira better pass dollar sef ten times. You tell me say make I wait till Oga patapata launch di e-Naira.

“Since dat day, I no see you again. Naira I no see, e-Naira I no see. And I hear say oga patapata don launch di e-Naira for Abuja since last month.

“Now I don catch you. You must to pay me my correct money for di two days wey I service you. I even dey put fisi for you. Keep your e-Naira, I no want am again. Pay me with di Naira wey everybody know.”

As di ashewo mouth dey do ta-ta-ta-ta like typewriter, nobody put mouth. Dis kind one fit break bottle scatter person head nau.

Mutiu jus bend im head down, e no fit look up. Shame finish am. Nobody know say Mutiu get ashewo customer for hotel. We tink say na only igbo and monkey tail e sabi shack.

Jimoh come ask di ashewo how much be Mutiu money. Di ashewo say e for be 6k for di two days. But as e be say Mutiu no dey use rubber, e dey like to do biebie to biebie, di money don jump to 9k. Plus 1k VAT. Tori Olorun!

My broda, na so all of us contribute 10k and give to di ogbologbo ashewo before e gree release Mutiu for shokoto trouser o.

Make we jam again on Tuesday.

Tank you

Tank you very much

And tank you very, very much indeed.