I no dey too like to put my guonguoro for road till night on Saturday and Sunday.

Wen man don work ti-ti-ti-ti from Monday, e suppose to find time and play small with im family for weekend. After all, oyibo dey talk am say body no be wood.

But last Saturday morning, I go drop one passenger like dat for Akuwonjo. Before I come reach our garage wey dey near Ikeja under bridge, time don nack 11 o'clock am in di morning.

I jus say make I go take one bottle of My Usual for Madam Shine Buka wey dey near Airport Hotel, before I begin go relax with my family for Abule Egba.

As I enter di buka, Sikiratu and im madam surprise to see me for morning time. Dem know me say, na wen I don do wahala for Lagos road finish for day time, den for night I go come take My Usual and pepper soup, before I begin go house.

Sikiratu run come hold me, e ask me why I come by dis time. I tell am say I jus wan come see im face small before I begin go house. Sikiratu mind come sweet well well. E say no wonder, becos e know say I no dey too show face Saturday and Sunday.

I no even siddon wen Madam Shine come meet me. E begin ask me weda I sabi say e be big woman for London before e come back for Naija come open dis buka.

E say make I no look am say, becos e come dey sell beer and pepper soup, e be small woman o.

E say for London, Queen and im husband wey jus peme sabi am well well. E say na every weekend dem dey invite am for lunch for Palace.

E say na im make e use dat connection dey helep Naija people wey dey for oyibo land. E say dat’s why everybody come dey call am Big Mummy.

As Madam Shine dey nack me dis tori, na so e dey show me orisirisi photo. E show me wen e stand with Queen. E show me wen e stand with oyibo MP dem. E show me wen Naija people for London dey hail am. I say na wa o.

E come begin show me photo wey e stand with Oga Lai. E say im and Oga Lai dey talk everyday.

I see say wen Sikiratu wan serve me My Usual as Madam Shine dey show me photo, Sikiratu dey cut eye for me. But I no understand.

(To be continued)

Make we jam again on Friday.

Tank you

Tank you very much

And tank you very, very much indeed.