My two woman pikin dem – Bisi and Funke – don jam JAMB since last year. But to get admission enter uniservity come be wahala.

I no know weda dis gofment wan make my pikin dem spoil finish. Olorun maje!

Na im make I no dey stop dem every time dem wan follow dia mama go dia church wey dey for Pen Cinema, even dough me I no dey go church or mosque.

Sote dem even be choir sef, and dia pastor like dem gan. I like am so becos, if I lef dem for house everyday, I no go know wetin dem dey do or wia dem dey go wen I don carry my guonguoro chuk head put for road?

But Funke surprise me yesterday gan. I don dey talk am tele tele say, if no be say I trust my wife Bose, I for don carry dat my second pikin go for hospital go do test weda true, true na me born am.

Funke too tear eye. One time like dat e say e wan marry oyibo, and e come be afin wey dey carry load for Ojota garage. Agbero! I nearly kill am dat day.

Anoder time, one morning like dat wey I forgot someting for house and I rush come back, I no see Funke for house. Im senior sister, Bisi tell me say Funke don comot. E say Funke go inside bush for di back of our street wey we dey live for Abule Egba.

As we jus dey talk, na im Funke come back. I ask am wetin e go do for inside bush. E first look ground, come take leg dey draw map. Den e come tell me say e been go inside bush go see im friend. Friend? Inside bush?

E say yes, say im friend name na Abdullahi, di aboki wey dey carry cows pass our street go inside bush everyday. E remain small make I use stone take scatter Funke head dat day.

(To be continued)

Make we jam again on Friday

Tank you

Tank you very much

And tank you very, very much indeed.