Posted by News Express | 18 May 2020 | 443 times
As di oga give me di cheque, I confuse. I begin dey sweat. I no fit tink clear with my head. If you see di kind money wey dis oga write for di cheque, afraid must to catch you.
I ask di oga weda na only me get all dat money wey e write for di cheque, e say make I jus manage am, say im sabi say all dat lockdown period, I no work. Na im make e say make e support me small with di money for di cheque.
I come dobale patapata for ground tank di oga. Una kukuma sabi how we Ogbomoso people go tank person wey do better for us nau.
I no come remember which road to take go Banana Estate from our garage wey dey near Ikeja under bridge. See me o! A hole Oga MAT wey don dey do taxi driver work for Lagos since Mary Slessor time! Money na wintch o!
But small time my eye come clear. Na im I come drive dey go to take IBB Bridge, from dia we go take Ikoyi and begin go Banana Estate make I go drop my better passenger wey Olorun send to me.
As we dey go for road, all my mind dey inside dat cheque wey my better passenger give me.
I come dey tink all di tings I go use di money do. My belle come sweet me, no be small.
Small time, we don enter Banana Estate be dat. We enter one street wey one big company dey. Di oga say make I drop am for di company gate.
As di oga jus come down, come see everybody for di company come dey greet di oga. Somebody open my guonguoro door for di oga to come down, anoder person carry di oga shine shine bag for am. One security waka for oga front, one for back, one for left hand side, anoder one for right hand. Na so dem escort oga dey go for im office upstairs.
As I wan turn my guonguoro begin go back, one sisi like dat for di company run come stop me. E say na im be oga PA. E give me card, e say na di oga say make e give me. Say oga say I fit call am anytime I like.
I tank di PA well well. As I look di card, na dat time I come know say na di Chairman/MD of dat big company I jus go drop for Banana Estate so. Olorun Oba o!
(To be continued)
Tank you very much.
And tank you very, very much indeed.
No comments yet. Be the first to post comment.