Me, too, I don mad o!

Posted by News Express | 12 May 2020 | 1,140 times

Gmail icon

Work dey go on coole since wen oga patapata open door for us make we jump out like dog dem wey dey inside cage for one month.

My guonguoro don dey see Lagos road again, and Lagos road don dey see my guonguoro.

Na so yesterday, one bobo and one sisi like dat come meet me for our garage wey dey near Ikeja under bridge. I see say di sisi jus dey hold di bobo for hand like say di bobo na small pikin.

Well, I jus talk am for my mind say na love dey shack di sisi. E fit be say e jus catch di bobo.

Di sisi say make I carry di two both of dem for drop go Yaba. I tell am my price, e gree. I say make dem enter. Dem enter, siddon for back seat.

E come be like say sleep dey catch di bobo. To talk sef, na wahala.

I come see say, any time di bobo manage open mouth and say someting, di sisi go say “Mad o!” And di ting wey di bobo dey talk, I listen tire, I no fit hear.

I take Ikeja GRA, reach Onigbongbo, from dia enter Ikorodu Road for Idi-Iroko bus stop.

As we reach Anthony bus stop, di bobo manage say someting again, di sisi shout again "Mad o!”

Wen we reach Fadeyi, to pass under di bridge for Jibowu, and begin go Yaba, di bobo manage say someting again, and again di sisi shout “Mad o!”

Na dat time I come understand: Yaba ... mad!

As we jus reach dat place wey dem dey call Yaba Left, I drive face di compound. Security wan come open di gate make I drive enter di compound, na im di sisi come shout,

“Oga taxi driver, where are you taking us to? Is this the place I told you we are going to?”

I come tell di sisi say, shebi na mad o, mad o, e don dey shout since, and I see as im bobo dey do, ehn, na im make I carry dem come Yaba Left nah, wey be di hospital for people wey get kolomental.

Na so dis sisi begin laugh. E laugh ti-ti-ti-ti sote me and all di security people for di gate confuse.

Wetin make dis sisi laugh like dis for di serious matter wey we dey talk? Abi na di two both of dem kolo?

Di sisi come talk say na dia house for Alagomeji near Yaba dia dem dey go. E say nobody mad. E say “Mad o!” na di ting wey dey reign for youth now.

E say im husband no mad, only be say e take over dose of monkey tail, wey be mixture of Sapele Water plus igbo, say na di mixture dey worry am. E say if e sleep now wake up,  e go dey okay.

Na im me sef come begin laugh and shout “Mad o!”

I put my guonguoro for revise, turn and go drop dem for Alagomeji. Mad o!

Make we jam again on Friday.

Tank you.

Tank you very much.

And tank you very, very much indeed.


Source: News Express

Readers Comments

0 comment(s)

No comments yet. Be the first to post comment.

You may also like...