We don begin fire Coro for prayer for my house

Posted by News Express | 28 April 2020 | 951 times

Gmail icon

Since wen oga patapata tell us make we siddon for house becos of dis Coro, woman dem don take over everyting for house. Man dem don koolu temper.

Any man wey wan do gragra go jus hear nwi for im wife hand. If man siddon for house, no food and no bend bend sleep, na quench be dat nah.

Na im make for me o, since dis byforce siddon for house,  anyting wey Bose talk, I go say “na true”, weda or wedan’t e correct, I go say “na true talk”. I dey even answer am “Yes ma” now.

See like dat yesterday (Monday) night after oga patapata don talk for radio and TV finish, Bose say make everybody come for parlour make we attack dis Coro for prayer, becos e been tink say oga go talk say make everybody go back to work.

Bose tell our two woman pikin dem – Bisi and Funke – make dem cover dia head, say we wan pray as family.

Me wey no dey follow my wife go dia church wey dey for Pen Cinema, I no come know weda me sef suppose to follow cover my head.

Na make I no offend Bose, na im I use my handkerchief put for my head. Na so Bisi and Funke begin laugh. I ask dem wetin make dem dey laugh, na so dia mama come near me, comot di handkerchief for my head. I tell Bose “Am sorry ma. No be my fault ma”.

Di next ting be say, time for prayer don start.

Bose first sing one kind song like dat wey dem dey sing for dia church before dem pray. Me, I no kukuma sabi di song, I jus dey chew my mouth dey go.

After di song, Bose come say make everybody jus dey answer Amen wen e begin pray.

Bose say, “In di name of Jesus”

Everybody answer, “Amen!”

Bose say, “Fada God, we your sinful pikin dem don come to you dis night. Fada forgive all our sin.”


“Fada God, we tank you for dis Coro, becos you say for everyting we should give you tanks”

Na dat one I no come know weda make I follow say Amen or not. I come talk am for my mind say, how person go tank God for Coro? Shey Coro na better ting?

Bose continue:

“Fada we tank you becos dis Coro don make our family unite togeder as one. All of us dey siddon now 24/7 under one roof as family. All dose bobo wey dey disturb our pikin dem don rest. And all dose Lagos sisi wey no dey allow our husband and daddy see road don rest now. Fada, may your name be highly exalted in Jesus name!”

Na only Bose answer Amen.

Bisi look Funke, Funke look me, I look Bose. Nobody make pim.

Bose continue:

“Fada God, you know all our heart. Weda or not dem answer Amen, Fada you sabi everybody heart. I call on Holy Ghost fire to burn all dose nyama nyama for everybody heart in Jesus name!”

Na only Bose answer Amen.

“Fada God, we go continue tomorrow morning with dis prayer wen my people don ready to answer Amen. In Jesus mighty name I pray”

Na so all of us come shout a loud “A-M-E-N!!!”

Make we jam again on Friday.

Tank you.

Tank you very much.

And tank you very, very much indeed.    


Source: News Express

Readers Comments

0 comment(s)

No comments yet. Be the first to post comment.

You may also like...