Naija no dey carry last

Posted by News Express | 3 March 2020 | 740 times

Gmail icon

Anybody wey no respect Naija people, na im be say di person na learner.

Coro begin for oyibo land, but as e jus land for Lagos last week, everytin change. Nobody dey tink wetin e go do make Coro run comot for Naija, instead everybody dey hustle to use Coro make money.

Gofment say make people dey wash hand with water soap per second per second, and cover face like eleha. But waka go price water soap and nose cover now for any shop and hear di kind price dem go tell you.

Dem go first tell you say di soap and nose cover don finish for di shop. Na lie o. Dem wan collect better money for your hand.

Na so I siddon yesterday dey tink for our garage wey dey near Ikeja under bridge. I dey tink how I go manage dodge dis Coro ting for dis Lagos wey people plenty like sand sand.

Every morning, afternoon and night, na so so passenger I dey carry for my guonguoro. How I go take know who carry Coro and who no carry? I be wintch?

As I dey tink, na im Sikiratu enter our garrage with one motor truck like dat. Before I say anyting, Sikiratu don tell di agbero dem wey follow am come make dem begin off load carton upon carton  wey dey for di motor truck. Tori Olorun!

Tank God say na only me dey for our garage dat time. I ask Sikiratu wetin all dis carton be, e say na water soap and face cover dey inside. E say na im dey produce am by imsef as all di shop wey dey for Lagos dey sell dia own with plenty money.

Sikiratu say di water soap and face cover wey e bring so reach 100 carton, and na 50 dey inside one carton. E say make I helep am sell am to my union member dem, so dat dem and dia passenger go dey use am.

Sikiratu say shebi I know say e love me well well, dat's why e dash me one carton of di soap and face cover wey all my passenger dem and me go dey use.

E say anybody wey wan make I carry am, I go tell di person make e first use di water soap wash im hand, den use di face cover before e enter my guonguoro.

I come talk am for my mind say see dis buka girl o. So kia kia e don go open factory dey produce water soap and face cover jus becos Coro don show face for Lagos?

And how I go tell any passenger wey I wan carry make e first wash im hand and cover im face before e enter my guonguoro?

Na so olopa dem jus drive enter our garage, jump down, point dia gun and begin shout, “Who is di owner of this truck?”

Sikiratu tell dem say na im get am. Sikiratu ask olopa weda dem wan buy di water soap and face cover.

Olopa say dem don dey follow di motor truck till e reach our garage. Say na fake goods e carry.

Sikiratu look me, I comot my eye.

 Na so olopa carry fake Sikiratu, im fake driver, fake truck agbero and fake Coro product begin go for station. I send anybody message?

Make we jam again on Friday.

Tank you.

Tank you very much.

And tank you very, very much indeed.


Source: News Express

Readers Comments

0 comment(s)

No comments yet. Be the first to post comment.

You may also like...