Posted by News Express | 17 December 2019 | 988 times
Since we enter dis month of Keresimasi, orisirisi tings dey show face. Market people, gofment worker dem, school pikin o, church, mosque and even babalawo dem, all dey do Xmas promo. Television and Radio own sef berekete.
Our mother union don tap into di Keresimasi bonanza.
Na so I siddon for our garage wey dey for near Ikeja under bridge yesterday. I say make I rest small after I don go drop one passenger like dat for Apapa.
Una kukuma sabi how dat Apapa road be now. Na only Olorun go come down and solve traffic wahala for dat road.
Oga Osibande (I hope I get am right) don come try to solve di trailer “menace” (as e call am), e no fit. Oga Sanwo-Olu sef don try tire, no show. Di only person we dey wait for now make e come settle dis Apapa road matter na Olorun himsef.
Dat’s why, any passenger wey wan make we carry am for drop go dat Apapa side, e must to ready to pay double becos, wen you enter am, na di hole day work be dat.
So, as I come back from Apapa dey relax for garage, na im dispatch from our State union headquarters come our garage. Di dispatch ask me who be branch secretary for our garage, I tell am say na me be di honorable akowe of our branch.
Di dispatch hand over one letter to me, I sign for di letter and e go.
I open di letter to see wetin dey inside. Na im I see say na Xmas football competition schedule. Di competition go begin from next week till di last day of dis December for stadium. And people go buy ticket to watch am everyday.
All di union dem wey dey for transport sector for Lagos dey inside – Yellow taxi driver dem (wey be our own), BRT, LagBus, Keke Marwa, Danfo, Bolekaja, Uber, Taxify, Gidicab, OCar, RideMe, plus including Kabukabu sef.
Even di orisirisi Okada dem wey dey now, follow for di Xmas clash – ORide, Gokada, MaxOkada, etc etc.
Di ting be say, our branch executive no understand two matter wey dey inside dis Xmas clash.
Number one, dem no talk for di letter how we go take share di money wey go come from di gate fee.
Number two, dem come join we yellow taxi driver for di same group with danfo driver dem. Tori Olorun!
How dem go say make we, wey be old papa, enter field go begin kick ball with dose bobo (danfo driver dem) wey be say Igbo, Monkey tail, Alomo, Action bitters, Baby okwu, Agbeteshi, Sapele water and order orisirisi highness material dem na dia own?
Abi dem dey plan to finish us for dis odun? Dem no go succeed lai lai.
Jimoh, our branch chairman, don already take up di two matter, and I go tell una di outcome. Haba!
Make we jam again on Friday.
Tank you very much.
And tank you very, very much indeed.
No comments yet. Be the first to post comment.