Posted by News Express | 10 December 2019 | 940 times
Man pikin don hear nwi. Since wen I talk am say make people helep me draft reply wey I go give Sikiratu for di Xmas Budget 2019 wey e submit to me, I no fit rest again. E come be like say di hole world wan draft di reply for me.
Last Friday, I manage publish some reply, but since den, di son of man no know peace again. Olorun Oba o!
Di people wey I no publish dia own letter talk say dem wan come do protest for our garage wey dey near Ikeja under bridge. See me, see wahala o! Se, na by force?
Me, I be taxi drive. If I begin siddon read and publish letter wey people write every day, which time I go take do my work with my guonguoro?
Se, I do mistake tell show una di Xmas Budget 2019 wey Sikiratu send to me? And sote I come beg una say make una helep me write di reply.
Okay, if na mistake, I dey sorry, I no go do so again. After all di matter na between me and my Siki Babe, noting concern una for inside. I even fit decide to double di budget for Sikiratu, e no concern una.
Yes nah. After all Sikiratu dey do am for me too. See like di order time wey I carry our Union Treasurer, Idowu go Madam Shine Buka wey Sikiratu dey work, we shack tire. Sikiratu wan take shackies finish me and Idowu.
My Siki Babe first use one, one bottle do welcome for us before im madam use jealousy send am go market and took over. And di order buka girl dem come use wayo send dia madam comot too, and took over. Se, una still remember dat tori?
And no be di first time Sikiratu don spend for my head be dat. Remember early dis year during election time wey Sikiratu say e wan become councilor for politricks? Na me e give di contract to use my guonguoro go round di hole Lagos and paste im poster. Una sabi how much e pay me for dat job?
So, if Sikiratu don do all dis better ting for me, why I go run jus becos e give me ordinary budget for keresimasi? Tell me why?
If no be amebo spirit dey worry una, why una go rush to write di reply wey I go give Sikiratu and even wan force me make I publish am for di hole world to see?
Di only ting be say, di budget big pass me small. Wia I go see 100k give Sikiratu to do Xmas? Tori Olorun!
E fit be true, as some of una talk, say na padded budget. But di ting wey I know be say, me and my Siki Babe go find way settle before Xmas.
And dose people wey dey plan to come carry placard for our garage jus becos I no publish una reply, I dey wait for una. E be like say una wan go smell rod dis Xmas becos, if you Sowore me, I go DSS you. Simple!
Protest ko, demo ni.
Make we jam again on Friday.
Tank you very much.
And tank you very, very much indeed.
No comments yet. Be the first to post comment.