Cunny man die, cunny man bury am

Posted by News Express | 11 January 2019 | 1,989 times

Gmail icon


New year don come, na so all dis Lagos bobo dem don begin dey hustle for money by force, by fire.

I carry one madam like dat yesterday go drop for Apapa Wharf. Wen I dey come back, one bobo stop me for Costain. E say make I carry am go Mowe Ibafo. E say wen we reach for dia, I go wait for am make e drop di carton wey im carry for im oga.

I tell am say dat one no be drop, na charter. Di bobo gree. I tell am my price, e gree.

E say make I helep am carry di carton wey im keep for road side, make we put am for inside my guonguoro boot. 

Na so I bend down make I carry di carton. My broda, my waist nearly break into two. Di ting heavy like say e pack all di stone wey dey for dis world put inside di carton.

Na so di bobo rush follow me carry di carton put inside di boot. E open back seat and enter. Me sef enter my driver seat. As I open ignition want start, di bobo say wait, wait, wait!!!

Na so e rush open di door and jump down. E beg me make I open di boot and bring out di carton for am, say e want carry am for leg. See me see troublem o. Which kind wahala be dis?  Make I begin carry dat kind heavy ting again? No be me and you!

I tell am say make e drop make I dey go my way, say I no carry am again. Di bobo come kneel down beg me well well. E say im go add money join for wetin we gree before.

Wen I hear dat one, my belle come sweet. Na so we comot di carton for boot. E say im want siddon for front seat, carry di carton for leg. I say okay o. My own na make you pay me my money. Wetin concern me concern wia you siddon? If you like siddon for di roof of di guonguoro, na you sabi.

As we dey go for road, di bobo ask me weda I know why e comot di carton for boot, I say why. E say im no want take chances at all, say di kind ting wey dey for inside di carton, if anybody thief am, im own don finish be dat.

I ask am which kind ting dey for inside dia. Di bobo just open di carton small. Come see someting o! I no know wen I shout Olorun Oba o ooo!!!

(to be continued)

Make we jam again for Tuesday.

Tank you.

Tank you very much.

And tank you very very much indeed.


Source: News Express

Readers Comments

0 comment(s)

No comments yet. Be the first to post comment.


You may also like...