Lagos sisi dem don dey open dia teeth

Posted by News Express | 30 November 2021 | 424 times

Gmail icon


Na by dis time every year sisi dem dey change character. Dem go come dey over nice. And any man wey no sabi dia wayo go jus fall yakata inside dia trap.

E dey one sisi for my street for our area Abule Egba wey no dey greet me lai lai. If e see me drive dey come for morning, afternoon or evening, di sisi go even wan waka enter bush. All na make e no greet me.

And no be say di sisi fine sef. Fine face e no get. Im nose be like say na panel beater work am. Headlamp, zero. Boysquarters nko? Minus zero. But if you see di kind shakara wey dis sisi dey make, ehn? E dey waka sef like say e no dey shit. 

But on Sunday I close early, I say make I go rest small for house as my wife Bose and my two woman pikin dem – Bisi and Funke – don go dia church wey dey for Pen Cinema.

As I jus drive enter our street, na im di sisi dey waka come. I surprise say di sisi stop, flash im teeth (smile) and wave hand for my direction. I look back weda anoder motor dey follow my guonguoro for back, I see say na only me dey road. 

Me sef kukuma march break fiiaam. Afraid come catch me weda someting happen for my house wey di sisi wan tell me. 

Na so di sisi come near, e smile again and say, “Good afternoon Baba Bisi. Happy Christmas in advance, Oga MAT”.

Na dat time I come understand why di sisi come dey open teeth for me sote e stop me for road. 

I come talk am for my mind say, so e even sabi my pikin name and my own business name! Tori Olorun!

I know say as December don dey show face so, sisi dem get plans. But di son of man no go fall for dia trap. 

Helep me say Amin!

Make we jam again on Friday.

Tank you

Tank you very much

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...