Helep! Bose friend no let me rest (2)

Posted by News Express | 27 August 2021 | 808 times

Gmail icon


Dat runaway housewife Philo na real akpruka woman. Upon say e born five pikin before e run comot for husband house, Philo still dey do like say e never even drop one before.

But I come talk am for my mind say, if dis mama of five comot everyting wey e dey take do padding for im yansh and headlamp before e wear clothe on top, shey any man go look am second time?

Yesterday I say make I rest small for house before I begin go our garage wey dey near Ikeja under bridge. Na only me and Bose dey house, our two woman  pikin dem – Bisi and Funke – say dem dey go for special morning service for dia church wey dey Pen Cinema.

As e come remain only me and Bose for house, I jus dey turn body for chair. Small time I enter bedroom go lie down for bed, I call Bose. I jus wan see weda we go do bend bend sleep small.

Bose open di bedroom door and come inside. E ask me why I call am. I tell am say my back dey scratch me, make e come for bed come helep me scratch am small. 

Bose say “Baba Bisi, abeg come begin dey go your garage. I no dey for di mood for dat ting wey you dey find so”.

I tell my wife say na only to scratch my back I wan make e helep me do, no be anoder ting. Bose say make I swear. I tell am say, “I swear! If I lie make I tanda naked baf for bafroom”.

As Bose begin come meet me for bed, na im we hear knock for parlour door pom, pom, pom! Tori Olorun!

I use style go check who be di person wey come put sand sand for my garri dis very crucial time. 

As I open di parlour door, na Philo dey dia. Which kind wahala be dis? 

(To be continued)

Make we jam again on Tuesday.

Tank you

Tank you very much

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...