Dis business get weight gan (4)

Posted by News Express | 17 August 2021 | 747 times

Gmail icon


 

As I carry my head up look for my right as me and di three bobo siddon for dat Palmgrove joint, I see one man wey resemble one olopa inspector wey I sabi for Area F for Ikeja. Di man siddon for chair after my own. E do like say e no know me. Me sef do like say I no see am sef, make e no come tink say I catch am for bad joint.

Small time, di phone of di bobo wey been siddon for front wen we dey come begin ring. E answer di call. After, e tell di order two bobo say dia oga dey wait for dem for di operation place. Dem pay money for di drinks and pepper soup.

Di four both of us stand up go enter my guonguoro to go meet dia oga for wia dem wan do di operation dat night.

As we jus comot for di street wey di joint dey, na so olopa van block us. Di olopa wey dey inside dat van pass twenty, all with gun.

Na so di olopa order me to stop. Dem say make all of us come down and carry our hand up for search. Na dat time I see dat olopa inspector in mufti wey siddon near for dat joint.

Di bobo wey siddon with me for front wan bring out gun to shoot olopa, na im di olopa inspector quick quick hammer di bobo two bullet for head ppuuaarr, ppuuaarr!! Di bobo head scatter patapata. 

One bobo get up to run, anoder olopa fire am bullet for back, and na so di bobo fall inside gutter and peme. E come remain one of di amu robber. Dem put dat one handcuff for im hand, put am inside olopa van, and begin go station.

I surprise say olopa no jus touch me. E come remain only me and dat inspector in mufti wey siddon near me for dat joint.

Di inspector come shake my hand. E say, “Oga MAT you be correct man”.

E say na dat call wey I quick quick call OC Crime dat time wey I go piss before I drive di amu robber dem comot for our garage, na im helep dem get di amu robber dem. E say im don dey drive follow us for back since wen we comot for garage dey come Palmgrove. E say na as we enter di joint siddon, na im e signal all di order olopa dem to come wait for us.

Na so I jus begin tank Eledumare as e give me common sense wey no common. Olorun modupe lowo yin o!

Make we jam again on Friday.

Tank you

Tank you very much

And tank you very, very much indeed.


Source: News Express

Readers Comments

0 comment(s)

No comments yet. Be the first to post comment.


You may also like...