See me, see wahala! My wife wan open beer parlour

Posted by News Express | 13 July 2021 | 560 times

Gmail icon


 

Abeg make una helep me tell my wife, Bose say no be every business good for woman to do. 

We wey be taxi driver sabi wetin dey happen for town. Wen I don drive tire, I dey always go relax for joint to eat and take My Usual. And if extra money dey my pocket, I go add pepper soup join am.

I sure say, all of una know say Madam Shine Buka na my regular joint.

Plenty of all dis joint na woman dem dey run am. Some of dem na housewife, some na widow. But plenty of dem na woman dem wey don run comot for dia husband house. 

If you see wetin customer dem dey take dis woman dem dey do for all dis joint, hmmmmmm!!! Una kukuma sabi say nearly all dia customer na man dem be.

Di customer dem go dey buy drink for dem, and dem no go say no. Na im make all of dem na shacker dem be. Dem fit drink anyting.

Customer one go dash dem Shine Shine Bobo, dem go drink am. Customer two go give dem De Honorable, dem go collect. Customer three go buy Meta Meta for dem, dem go nack am. Odekun nko? Dem go shack all. And after dat nko? Na so all di customer go dey take turn for kini one by one. Tori Olorun! 

Tell me, dis one and di woman wey dey do full time for hotel, no be di same ten and ten pence?

Na so I come back yesterday night for my house wey I dey live with my family for Abule Egba. My wife Bose begin tell me say, as I no let am do di oyibo night work, e get business wey e wan do. E say e wan begin sell beer parlour.

My wife say make I no worry for di money, say one micro finance bank don gree to give am di money to take start di beer parlour business. Olorun Oba o!

Up till now wey I dey nack una dis tori so, I never get mysef since dat yesterday night. Olorun saanu mi o!

Make we jam again on Friday.

Tank you

Tank you very much

And tank you very, very much indeed.


Source: News Express

Readers Comments

0 comment(s)

No comments yet. Be the first to post comment.


You may also like...