Posted by News Express | 21 May 2021 | 574 times
If anybody swear for you say make trailer jam you, beg di person to tell you which kind trailer e mean.
Di ting be say, if motor trailer jam person, atlist dem go fit rush am go for emergency ward. And if di person get luck, e survive.
But if woman trailer jam sombori, hmm, di person own don finish be dat o - weda or wedan't na for bed abi na for road di jam take place.
See like di order day, I comot for house around 9 o'clock a.m in di morning begin dey go our garage wey dey near Ikeja under bridge.
As I reach Moshalashi Alhaja for Agege, na im one trailer, sorry madam, stop me.
I jus say make I stop, but for my mind I know say I no fit take di risk carry am for dis my guonguoro wey I dey manage so. I know say if I tell am high price, e no go gree pay.
As I match break fiiaaaaam, di madam come near, e say make I carry am for drop go Obalende. I tell one high price like dat, e say e go pay. I increase di price, e say e go pay. I increase di price again, di madam still gree to pay. Olorun Oba o!
Afraid come ask me. Na wetin I go come do nau. I sure say di madam go don tanda for dia tipe tipe, no taxi gree stop carry am. Na wetin make me stop?
If you see dis madam, afraid must to catch you. E jus resemble dat bobo wey dey advertise Michelin tyre for television. And im nyansh come be extra, extra large. I sure say na special tailor go dey sew all im dross becos im size no fit dey for market.
Di madam ready to pay any amount, which excuse I go take discharge am now?
Na so I come down, go open back door for am. To enter di motor sef hard am. E first put one leg inside, put im head, den tell me make I helep push im nyansh inside. Dat one na hard labour nau. Tori Olorun!
(To be continued)
Make we jam again on Tuesday.
Tank you very much
And tank you very, very much indeed.
No comments yet. Be the first to post comment.