LASTMA salute danfo driver? Kilode?

Posted by News Express | 26 March 2021 | 494 times

Gmail icon

Noting wey di son of man no go see for Lagos road. 

Orisirisi uniform full for Lagos roads – Olopa, Soja, LASTMA, Road Safety, Maja Maja, Yellow Fever, VIO, Council etc, etc.

And na only one ting all of dem dey ask for wen dem stop any driver – Particulars!

God helep you wen any of dem ask you for particulars and you bring out paper. Na for dat place you go park till tomorrow. 

Dem go ask you weda na paper dem go chop. And if wan do I too sabi, na for dia office you go land, and before you know, all your four tyres don go down fiiaaaaa! Wahala wey go follow, e better make you jus run go your village.

But since wey #EndSARS show Olopa dem pepper, dia body don calm down small. Na LASTMA dem come take over. 

If LASTMA stop you, na so one of dem go dey use phone take your motor picture, anoder one go open your motor front door by force and jump inside. If you like, beg from now till tomorrow, you jus dey waste your saliva – weda or wedan’t you dey wrong.

One passenger one day tell me say LASTMA mean “Lagos State Traffic Management Agency”. Na so I begin laugh. Di passenger embarrass. E ask me wetin I dey laugh, I tell am make e no vex, say na dat name make me laugh. I say di correct name for dem for be LASTDA. I say na damage dem dey damage traffic, dem no dey manage anyting. Na so my passenger begin follow me laugh.

But LASTMA surprise me yesterday wen I carry one passenger go drop for Ogba.

As we reach Omole Junction wey dose LASTMA dey always full, one danfo don nearly pass finish wen traffic light show yellow, but di danfo driver match break quick quick.

I see one LASTMA waka go meet di danfo. I sure say di danfo driver go don tink say e go hear nwi for LASTMA hand today.

But di next ting be say, LASTMA tanda for attention, smile and salute di danfo driver. Shiooorr! Kilode? I shock.

Na my passenger come make me know wetin dey happen.

My passenger talk say since last week wey danfo driver dem fight and kill one LASTMA for road, all dia body don come down like say dem pour dem ice water. My passenger say since den, na so LASTMA dem dey salute all danfo driver for Lagos roads.

I come talk am for my mind say two down, e remain dose wintch wey dem dey call VIO.

No be me talk am o!

Make we jam again on Tuesday.

Tank you

Tank you very much

And tank you very, very much indeed

Source: News Express

Readers Comments

0 comment(s)

No comments yet. Be the first to post comment.

You may also like...