No how, Oga Sanwo-Olu must hear dis!

Posted by News Express | 12 February 2021 | 845 times

Gmail icon

Dis taxi driver work wey man dey do no mean say I be mumu. Nobody fit use my head and tink say I go jus keep quiet like mumu.

Before Keresimasi last year, na so one tiny bobo like dat wey im neck long like ostrich own, waka come our garage wey dey near Ikeja under bridge.

Di bobo come with one madam wey im boysquarter big and long like IBB bridge. I sure say dat madam been study packaging science for school becos di way e take pack im boysquarter inside di tight skirt wey e wear, hmm, no how wey man no go look am twice and swallow saliva. Tori Olorun!

Di two both of dem carry plenty office file come our garage. And di time wey dem come, na only me dey. All our union member dem don carry passengers go drop.

Di bobo talk say dem come from Alausa, say na Oga Sanwo-Olu tell dem to go round and collect name of people wey get paper to show say dem dey live for Lagos, plus other orisirisi details.

Dem say Oga Sanwo-Olu wan use am give Lagos people plenty money wey oyibo send come to take shock di knock wey Coro nack us for head, belle and pocket.

Dem say di money reach like 500k for one person. Olorun Oba o!

Wen I hear dat one, na so all my body come stand like standard bank.

Dem say make I give dem names of my people. Quick quick, I give four name. Me, Bose, Bisi and Funke.  

Di bobo and madam ask me how I take relate with di people wey I give dia name so. I tell dem say Bose na my wife, Bisi and Funke na my two pikin.

Dem come tell me say my name don cover my family, say na my union members dem want. 

I give dem name of our union chairman Jimoh, treasurer Idowu and social organiser Akpan. I also give dem Emeka and Mutiu name. All come be six of us.

Dem ask me our phone number, house number, bank account number, LASSRA ID number, NIN, driver’s licence and order orisirisi tings. 

Tank God say na me be Akowe of our union branch, I get everybody details for my file.

Wen dem wan go, dem say all of us go receive message for our phone wey go tell us di day and place to come collect our Coro money. 500k!

My broda, my belle sweet dat day, no be small.

Wen my union member dem come back for garage, I tell dem wetin Oga Sanwo-Olu wan give us, na so my people begin sing, dance and drink in advance.

(To be continued)

Source: News Express

Readers Comments

0 comment(s)

No comments yet. Be the first to post comment.

You may also like...