Na wa for Lagos landlord dem o! (3)

Posted by News Express | 9 February 2021 | 563 times

Gmail icon

Since dat time wey I see say my landlord, Baba Braimoh, don dey monitor me like monitoring spirit jus becos of di yeye meeting wey e fix for evening, my mind come spoil patapata.

I look time, na 1 o'clock p.m. in di afternoon. Na im I say make I come dey go house. With Go-slow and everyting, if I comot for our garage wey dey near Ikeja under bridge now, no how, no how, before 3 o'clock p.m. in di afternoon, I go reach our house for Abule Egba. 

As I reach house, my wife Bose and my two woman pikin dem – Bisi and Funke – shock. 

My people never see me for house by dat kind time before. I tell dem say Baba Braimoh no let me rest. E say e wan hold meeting dis evening with all di tenant.

I tell dem say na im make I come back by dis time becos I no wan anyting wey go make me late for di meeting, wey go make Baba Braimoh come begin dey talk to me any how.

I baf, chop and rest. Small time evening don come. Landlord say make all di tenant come for outside, in front of di compound. Come see tenants! Tori Olorun!!

Baba Braimoh house na face-me-I-face-you. Di house get two corridor, and each corridor get like 10 room. Baba Braimoh live with im family for anoder attachment wey resemble boysquarter for back. 

For di main building wey get 20 rooms, na only me dey live for room and parlour with my family. Di rest tenant dem dey live for one, one room. So all of us come be 19 tenant for one house – one toilet, one bafroom, one kitchen. And everybody live with im family o. Olorun Oba o!

All di tenant complete for di meeting.

Baba Braimoh say e wan go straight to di point. E say na four tings:

1. Im son, Braimoh wan marry next month

2. Im sef (landlord) wan marry wife number 3

3. E wan open shop for im second wife, becos e no like as di woman dey carry Agbo for head dey waka di hole Lagos dey sell.

I come talk am for my mind say, how all dis tings take concern we di tenants nau.

Everybody jus dey listen, nobody gree talk. E come be like say Davido play Fem for dem.

Na im Baba Braimoh come talk say, all di ting wey im talk so na money go kill am.

E say na im make e call di meeting to tell us say rent and everyting don increase. - house rent now na N6000 for one room. Security no be N2000 again, now na N3000. Everybody no go wait for NEPA bill again to come before we share and pay. Now everybody go dey pay N5,000 to landlord every month for NEPA. Last, money to trowey dirty now na N2,000, no be N1,000 again.

Some tenant wan ask question, Baba Braimoh say no question, meeting don finish. E say all di money begin dis February ending.

Na so Baba Braimoh lef us, waka go im house. Everybody jus dey look ground, dey shake leg and head. Nobody fit talk. 

I come dey tink how much I go dey pay every month now.

Wen I add everyting togeder, my broda, I no fit sleep till day break. For dis Coro time? 

Make we jam again on Friday.

Tank you

Tank you very much

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...