Level don change patapata

Posted by News Express | 25 January 2021 | 721 times

Gmail icon

Di kind harmattan wey dey now for Lagos na wa o. For dat Xmas time wen e dey blow for order parts of the contry, harmattan no jus show face for Lagos. Na for dis New Year di ting come full ground.

Now, to wake up for morning baf go work, na wahala. For day time, sun go dey nack person for head ti-ti-ti-ti, you go nearly kolo.

And wen you close for evening go house, na so man go jus fall for bed yakata. Body go jus dey hammer you kpua kpua kpua!

See like yesterday wen I close work, I reach house late becos of di kind Go slow wey dey for Ikeja. E take me 4 hours to drive from our garage wey dey near Ikeja under bridge, to my house for Abule Egba. Tori Olorun!

Wen I jus enter compound dat night, na so I park my guonguoro, enter house, jump enter bed with all my clothe complete. No baf, no food...

Small time I jump up as I remember di woman wey say make I come carry am early go drop for airport.

As I reach di madam house for Opebi, di woman don prepare finish dey wait for me. I jack up madam bag and put am for my guonguoro boot. I open back door for madam, e enter and I close di door. We don dey go airport be dat.

As I enter airport car park, madam come down but e say make I helep am carry di bag follow am go departure. Madam pay me extra money for dat.

Wen we reach for departure, na im dem jus announce madam flight. Dem check in madam, di woman say make I still follow am enter tarmac. I no come know di kind magic wey madam use wey make di airport people allow me follow madam enter tarmac.

As passenger dem dey climb ladder enter inside di aeroplane wey don already put on engine, madam still give me sign make I follow am enter inside di aeroplane. Olorun Oba o!

I shock wen di pilot see me for inside di plane and shout “Oga MAT”!

I talk am for my mind say so even aeroplane pilot sef sabi me.

Di pilot tell me say dem wan take off now to Paris. E say I go siddon with am for captain seat, say e wan show me how to drive aeroplane. E say e wan change my level patapata today, from ordinary Lagos taxi driver to international pilot.

I no know wen I shout “O ti o!!!” ...

I hear person tap me for my back and say, “Baba Bisi! Baba Bisi!! Who dey disturb you wey make you dey shout for dream? Wake up.”

I turn my body, look at time. I see say na 12 mid night. Na im I continue with my sweet sleep.

Make we jam again on Friday.

Tank you

Tank you very much

And tank you very, very much indeed.


Source: News Express

Readers Comments

0 comment(s)

No comments yet. Be the first to post comment.

You may also like...