Soja don naked omoge wey wear short cloth for poblic

Posted by News Express | 7 December 2020 | 946 times

Gmail icon


 

One soja man wey e be like say not comot for him head don naked one fine omoge bicos say she wear short clot for poblic. My people, na for Oju-Ore wey dey for Ota, Ogun State, dis abomination happen for around 9:47 O’clock for morning for Saturday, December 5 for di year of our Lord Jesus Christ 2020.

Di offence of the omoge be say she no wear cloth wey cover her bod well well. The omoge wear short kniker and white knitted blouse on top dey denge pass when the soja man wey dey inside bus see-am.

People wey watch de action film koror koro say bifor you say Jack Robinson, the soja man, wey nobody sabi his name, don order driver say: STOP!!! bifor I go finish you bloody civilian. Na him de driver come stop.

Bifor you know wetin dey happen, soja man don jump comot for moto, run quick quick go pounce on de omoge begin dey beat.

He rain plenty dirty slap for the omoge face and as she try run for dar life, na him te soja man pullam back with iron hand as he hold her braided long hair too strong.

Quick-quick, de soja man we nobody send work don comot the omoge’s blouse. As he wan comot her bra, na hin people wey dey waka pass say, “Ah-ah! Na wetin be dis? Oga soja, a beg take-am easy”.

As dem come beg, beg, beg de man-o, na him he come develop church mind and tell the babe: “Go and sin no more”.

Mission accomplished, na him de soja man quick-quick jump into the commercial bus wey carry-am and – fiam! the driver drive comot.

Tori people try make dem reach the tafia person for 81 Division of the Nigerian Army, Major Olaniyi Osoba, but him line dey say: “The number you’re calling is switched off. Please try again later”, “The number you’re calling is switched off. Please try again later” . . .




Source: News Express

Readers Comments

0 comment(s)

No comments yet. Be the first to post comment.


You may also like...