I don get my first special call for December (2)

Posted by News Express | 4 December 2020 | 705 times

Gmail icon

As e be say I dey rush dat Tuesday morning to go attend our union meeting for our garage wey dey near Ikeja under bridge, I no come know weda to park for one corner of di expressway and pick di call, weda to jus pick di call as I dey drive dey go, or to kukuma ignore di call.

I come talk am for my mind say, but dis number wey dey call me so, na special number, and I no get am for my phone.

I come decide to park and pick di call. I slow down, park for roadside and off my engine. As I carry my torch light chinko phone up to pick , na im di call cut. Tori Olorun!

I wait small to see weda di person go call again. E no call. I start engine and begin dey rush dey go. As I jus enter express again, my phone begin ring again. And na dat same special number.

I come use boldface to pick di call as I dey fire my guonguoro dey go. After all, man die but once. And someting must kill a man. And tank God say olopa dem never come since #EndSARS drive dem comot for road. So nobody go stop me say I dey pick call for steering.

I carry my phone again to pick di call as I dey match trottle dey go, na im di call cut again. Aaah! Kilode ?

Na so I jus dey fire dey go. By dis time I don reach Guinness, to begin go Second Gate. As I reach dat Adeniyi Jones junction for First Bank, di traffic light wey dey for dia come show red. I stop, and na so my phone ring again. I look am, na di same special number.

I happy say I go pick am now wey I standstill for traffic light. I carry up my phone to pick di call, di call cut again. Olorun Oba o! I come talk am for my mind say, shey my village people don dey come?

Small time di traffic light show green. I put my guonguoro for gear one and move.

I drive enter garage by sharp 8 o'clock a.m on di dot, wey be our meeting time.

I park my guonguoro, open di door and come out. Na im one sisi waka come meet me. I look am well well. I come see say na one sisi like dat wey I meet for Isale Eko before Coro enter Lagos.

Di sisi say e don dey wait for me for garage ti-ti-ti-ti. E say e get wetin e wan discus with me.

I tell am say as e see me so, I dey for hurry. I ask am weda e no see all our union member dem siddon for dia. I say na me dem dey wait for becos we get meeting, and na me be Akowe.

I jus lef di sisi run go enter meeting.

(To be continued)

Make we jam again on Tuesday.

Tank you

Tank you very much

And tank you very, very much indeed.


Source: News Express

Readers Comments

0 comment(s)

No comments yet. Be the first to post comment.

You may also like...