I need better doctor, abeg

Posted by News Express | 11 September 2020 | 594 times

Gmail icon

See me see wahala o. I run comot for my village for Ogbomoso, come Lagos make I no peme, but my village people still dey carry village wahala come meet me for Lagos. Tori Olorun!

Di order day, I go drop one passenger like day for Apapa.

Di kind Go-slow wey dey for dat Apapa road, no be small ting. To go, na wahala, to come back, na dat one bad pass sef. Motor jus dey tanda one place for road, no movement ra-ra-ra. Sote my engine come dey do over heat.

As I manage come back for our garage wey dey near Ikeja under bridge, I say make I take style relax small and make my guonguoro engine also cool down.

Na im one bobo like dat waka come meet me for wia I siddon dey take breeze.

Di bobo look me ti-ti-ti, me sef look am back. Den e come greet me good afternoon. I greet am back.

Small time, di bobo ask me weda na me be Oga MAT. I tell am say by di grace of God. I ask am wetin I fit do for am, weda e be passenger and wia e wan make I carry am go. Den I ask am weda na drop abi charter.

Na so di bobo jump for my body. E come dey shout say, “Jesu! Tank God I don see my papa today o! Jesu modupe lowo yin o! Father I thank you o!”

I shock. I ask am who be im papa. E say na me. I tell am say e no know wia e come from.

Di bobo say im be 55 year old, say e sabi wia e come from well well.

Di bobo come siddon near me, I shift comot small. Di bobo ask me weda I no be Ogbomoso man. I tell say I be original Ogbomoso man, no be fake.

Di bobo say im sef e be Ogbomoso, e say in fact, anywia I come from, na dat place im sef come from.

E come ask me weda I sabi one woman wey dem dey call Arike for Ogbomoso. I tell am say di only Arike I know for Ogbomoso na one girl wey me and im been dey go night school togeder.

I say me and dat Arike dey for Standard 5 togeder and we dey siddon di same table. But Arike come get belle and im papa talk say na me give im pikin di belle.

I tell di bobo say Arike papa na babalawo and e wan take African Insurance finish me for village, na im make I run come Lagos since dat year 1965.

Di bobo come talk say,

“Na me be dat belle wey Arike get dat time”.

Olorun Oba o! My broda, I faint.

(To be continued)

Make we jam again on Tuesday.

Tank you

Tank you very much

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...