Posted by News Express | 25 August 2020 | 798 times
Since yesterday wen Sikiratu come meet me for our garage wey dey near Ikeja under bridge, my life no be di same again.
All my mind, brain, mouth, nose, hand, leg, ear, head and even my kini, all dey tink of Sikiratu now. See as dis small pikin don come put agbalagba like me for high jump. Tori Olorun!
Dat yesterday, Sikiratu come tell me say tomorrow wey dey come so, na im birthday. I tell am happy birthday for advance.
Sikiratu tell me, “Tank you Oga MAT”. Den e come tell me say, but no be only “Happy birthday” e wan from me.
I come ask am wetin again e wan for my hand.
E come ask me say, sebi I know say na me, Oga MAT, be di only person wey e get for dis Lagos. I say I know.
E say sebi I know say I be di only man for im life. I say I know.
E say make I search am inside out, turn am upside down, I no go hear say e get any order darling for dis world apart from me. I say I know.
I come tell Sikiratu make e forgot all dis sermon and go straight to di point. I ask am wetin e wan from me.
Sikiratu say sebi I know say since wen we begin do dis our lovi lovi, I never touch am well well, as Madam Shine no dey gree give am off duty for dia beer parlour/pepper soup joint.
E say becos of im birthday, Madam Shine don give am off dat day. Sikiratu say e wan make we stay, enjoy and sleep togeder TDB for im birthday. I say shiooorr!
Sikiratu say dis one no be shiooorr matter. E say I must make am feel like woman for im birthday.
I no even tink dat one finish, Sikiratu bring out one paper wey dey im handbag, and give me. E say na di list of tings wey I go buy for am to take celebrate di birthday.
E say e go come back today 3 o’clock pm in di afternoon to collect money for di birthday list and di money to go book wia me and im go dey togeder TDB.
As Siki Babe waka comot for garage, up till now wey I dey nack una dis tori so, I confuse.
Abeg, how I go take handle dis matter before e too late?
Make we jam again on Friday.
Tank you very much
And tank you very, very much indeed.
No comments yet. Be the first to post comment.