If gofment open school today sef, my pikin dem dey kampe

Posted by News Express | 28 July 2020 | 826 times

Gmail icon

Dis Coro don cause plenty wahala, I swear.

And dis one wey be say oga patapata go talk today say school go open, tomorrow e go say school no go open, I no jus come understand again.

See all di school pikin dem don siddon for house sote nyansh don dey pain dem.

But di ting be say, plenty of dem wey be boys don join bad gang. If dem never join agbero dey smoke wee wee, dem don become amu robber.

Di girls nko? Plenty of dem don turn dia papa house to ashewo hotel. Some dey take style tanda for street wen day dark small, dey find market. Some sef no care, dem dey do dia own for afternoon korokoro.

Na 4 months be dis since Coro begin shake town. Wait make 9 months reach, una go begin see result one by one.

My two woman pikin - Bisi and Funke - wey don jam JAMB tipe tipe, still dey for house, dem never enter uniservity.

Na im make wen I hear say gofment don dey plan to open school again, my belle come sweet well well.

Yesterday, I no carry any passenger becos I jus make up my mind say na Idumota market wey dey for Isale Eko I dey go.

As I reach di market, I begin buy everyting wey Bisi and Funke go use for school to take shock dis wicked Coro.

I buy face mask 2 carton for di two both of dem. I buy sanatiser 2 carton - even dough gofment talk say school go dash dem sanitiser.

I buy 2 raincoat, 2 rainboot, 2 black eye glass, 2 face cap and gloves wey dem go dey wear to take cover all dia body day and night, even wen dem dey sleep, make Coro no near dem.

Wen I buy everyting finish, I call two Aboki make dem carry di load go put inside my guonguoro boot for car park.

As I drive dey go back for road, I jus dey happy. I dey talk am for my mind say, if gofment like make dem open school today sef, my pikin dem don ready. Coro no fit touch dem rara. Insurance cover dem from head to toe, plus including dia eye sef.

Make we jam again on Friday.

Tank you.

Tank you very much.

And tank you very, very much indeed.

Source: News Express

Readers Comments

0 comment(s)

No comments yet. Be the first to post comment.

You may also like...