Posted by News Express | 14 February 2020 | 341 times
So if I gree to render dis service to Sandra, plenty of dis dollar money wey we change go be my own?
So if I gree, everyday my work go be to drive dis sisi around town, wen we hungry we branch for Mr Bigg's, Tantalizer or Shoprite, eat and drink?
So if I gree, after we don go round town, eat and drink, we go return to Four Points Hotel wia I go jus siddon for hotel room with dis fine Americana wey resemble angel, talk and laugh till day break? No order ting o!
So if I gree, after all dis jolly jolly, and after e don dey pay me for my service every day, wen e wan go back to America next week, Sandra go still count dollar give me?
Na im be say my own don better be dat. Na only original mumu go reject dis kind offer.
As we land for Lekki Beach, I drive enter car park. Sandra bring out money for im handbag, e no even count am. E say make I take di money go rent di tent wey me and im go siddon inside for like 20 minutes before we begin dey go.
As I reach for di beach oga office, I count di money wey Sandra give me, na N5,000. Di beach oga say to rent tent and two beach chair na N2,000. I count money pay and collect receipt.
As I go meet Sandra for car park, I give am di receipt and N3000 change. E return di change to me, e say make I hold am till we reach OUR hotel room. I come talk am for my mind say so my pay don begin be dat. Olorun Oba o.
Wen we enter di beach tent siddon, Sandra look me, I look Sandra. E open im handbag and bring out swimming pant and begin to wear am.
I wan use style waka comot small, na im Sandra ask me wia I dey go. I tell am say I wan give am chance small as e remove clothe.
Di sisi begin laugh. E say wetin be new? E ask me weda I never go beach go swim before. I tell am say di only time I don swim na for my village river for Ogbomosho, and na wen I be small boy.
Sandra say make I siddon, make I no go anywia. E even say make I helep am remove im jeans trouser and blouse wey e wear.
Come see di kind body wey dis America sisi carry for yonder! Wen I see am, I nearly faint. I come tink say weda na mammy water I dey with. Sandra remove everyting in my very before, and begin wear swimming pant. Mogbe!
Di next ting, e say make imsef helep me remove my own shokoto trouser and jumper. E say our own Valentine don start be dat. Tori Olorun!
(To be continued)
Make we jam again on Tuesday.
Tank you very much.
And tank you very, very much indeed.
No comments yet. Be the first to post comment.